Ungal icerrgen

D tidet, ula deg wannar n ddabex yettzelzil wul-is mi ara issel i wannect-n akk n yimeddukal ttsuɣun « Anwa wigi... d Imaziɣen ». D acu, tikelt-agi, imi s-yesla i tefyirt-agi tenṭeq-d yis-s tqemmuct tazeggaɣt n Siwa, ilul-d deg-s uḥulfu nniḍen... Am akken yuḍen ul-is, ittḥulfu-as ar daxel n yidmaren-is ittejgellib am yiddew amcṭuḥ. Yuli-t-id yiwen uḥulfu werǧin yeẓri. Yuɣal wul-is am akken ula d netta yesɛa ul ! Am akken iḥemmel ijeǧǧigen, am akken iḥemmel igerdan... D acu-tt akka lmeḥna-agi !? Waqila ula d iḍarren-is bɣan ad d-qqecṛen ɣef lqaɛa. Yettḥulfu am akken yesɛa afriwen tura, neɣ yebɣa ad isɛu afriwen akken ad yafeg yis-sen, neɣ yesɛa ahat maḍi afriwen yettafeg yis-sen yakan... Iḥulfa i yiman-is yezmer ad yaru isefra. Iḥulfa-as i ṛṛuḥ n Si Muḥ Umḥend ikcem-d deg-s, izdeɣ tafekka-s, iddem-d akk lɣuc yeẓẓan deg wul-is, iqleɛ-d jeddi-s seg yiẓuran, yeẓẓa deg umkan-is « Leḥnana ». Iḥulfa s leḥnana tettazal deg yidammen-is, ay atmaten !